ആത്മീയ വളർച്ചയ്ക്കും ഭക്തിക്കുമുള്ള ദൈനംദിന പ്രാർത്ഥനകൾ
പ്രാരംഭ പ്രാർത്ഥന, നാല് ദൈവരഹസ്യങ്ങൾ (ഇന്നത്തെ രഹസ്യങ്ങൾ അടയാളപ്പെടുത്തിയിരിക്കുന്നു), ലുത്തിനിയ, സമാപന പ്രാർത്ഥനകൾ — പൂർണ്ണരൂപം.
പ്രാരംഭ ഗാനവും പ്രാർത്ഥനയും, 14 സ്ഥലങ്ങൾ, സമാപന ഗാനവും പ്രാർത്ഥനകളും — പൂർണ്ണരൂപം.
സ്വർഗ്ഗസ്ഥനായ ഞങ്ങളുടെ പിതാവേ, അങ്ങയുടെ നാമം പൂജിതമാകണമേ. അങ്ങയുടെ രാജ്യം വരണമേ. അങ്ങയുടെ തിരുമനസ്സ് സ്വർഗ്ഗത്തിലെപ്പോലെ ഭൂമിയിലുമാകണമേ. ഞങ്ങൾക്ക് ആവശ്യമായ ആഹാരം ഇന്ന് ഞങ്ങൾക്ക് തരണമേ. ഞങ്ങളോട് തെറ്റു ചെയ്യുന്നവരോട് ഞങ്ങൾ ക്ഷമിക്കുന്നതുപോലെ ഞങ്ങളുടെ തെറ്റുകൾ ഞങ്ങളോടും ക്ഷമിക്കണമേ. ഞങ്ങളെ പ്രലോഭനത്തിൽ ഉൾപ്പെടുത്തരുതേ. തിന്‍മയില്‍നിന്ന് ഞങ്ങളെ രക്ഷിക്കണമേ. ആമേൻ.
എന്റെ ദൈവമേ, ഈ പുതിയ ദിവസത്തിനു ഞാൻ നന്ദി പറയുന്നു. ഈ ദിവസം മുഴുവൻ എന്നെ വഴിനടത്തണമേ. എന്റെ ചിന്തകളും വാക്കുകളും പ്രവൃത്തികളും അങ്ങയുടെ മഹത്വത്തിനായി സമർപ്പിക്കുന്നു. എന്നെ കാത്തുപരിപാലിക്കണമേ. ആമേൻ.
സ്വർഗ്ഗസ്ഥനായ പിതാവേ, ഈ ദിവസത്തിലെ അനുഗ്രഹങ്ങൾക്ക് നന്ദി. എന്റെ തെറ്റുകൾ ക്ഷമിക്കണമേ. ഈ രാത്രി എന്നെ കാത്തുസൂക്ഷിക്കണമേ. സമാധാനപൂർണ്ണമായ ഉറക്കം നൽകണമേ. ആമേൻ.
കർത്താവേ, ഈ ഭക്ഷണത്തിന് ഞങ്ങൾ നന്ദി പറയുന്നു. ഇത് ഞങ്ങൾക്ക് നൽകിയ അങ്ങയെ ഞങ്ങൾ സ്തുതിക്കുന്നു. വിശക്കുന്നവർക്ക് ഭക്ഷണം നൽകണമേ. ഈശോമിശിഹായുടെ നാമത്തിൽ. ആമേൻ.
സർവ്വശക്തനായ ദൈവമേ, എല്ലാ അനുഗ്രഹങ്ങൾക്കും ഞാൻ നന്ദി പറയുന്നു. എന്റെ ജീവിതത്തിൽ അങ്ങയുടെ കൃപ നിറയ്ക്കണമേ. എന്നെ അങ്ങയുടെ സ്നേഹത്തിന്റെ ഉപകരണമാക്കണമേ. എന്നും അങ്ങയെ മഹത്വപ്പെടുത്താൻ എന്നെ സഹായിക്കണമേ. ആമേൻ.
സർവ്വശക്തനായ പിതാവും ആകാശത്തിന്റെയും ഭൂമിയുടെയും സ്രഷ്ടാവുമായ ദൈവത്തിൽ ഞാൻ വിശ്വസിക്കുന്നു. അവിടുത്തെ ഏകപുത്രനും നമ്മുടെ കർത്താവുമായ ഈശോമിശിഹായിലും ഞാൻ വിശ്വസിക്കുന്നു. അവിടുന്ന് പരിശുദ്ധാത്മാവിനാൽ ഗർഭസ്ഥനായി, കന്യകാമറിയത്തിൽനിന്ന് ജനിച്ചു. പൊന്തിയോസ് പീലാത്തോസിന്റെ ഭരണകാലത്ത് പീഡിപ്പിക്കപ്പെട്ട്, കുരിശിൽ തറയ്ക്കപ്പെട്ട്, മരിച്ച് അടക്കപ്പെട്ടു. പാതാളത്തിലിറങ്ങി, മൂന്നാംനാൾ മരിച്ചവരിൽനിന്ന് ഉയിർത്തെഴുന്നേറ്റു. സ്വർഗ്ഗത്തിലേക്ക് കരേറി, സർവ്വശക്തനായ പിതാവായ ദൈവത്തിന്റെ വലത്തുഭാഗത്ത് ഇരിക്കുന്നു. അവിടെനിന്ന് ജീവിക്കുന്നവരെയും മരിച്ചവരെയും വിധിക്കാൻ വരുവാനിരിക്കുന്നു. പരിശുദ്ധാത്മാവിലും വിശുദ്ധ കത്തോലിക്കാ സഭയിലും പുണ്യവാന്മാരുടെ ഐക്യത്തിലും പാപമോചനത്തിലും ശരീരത്തിന്റെ ഉയിർപ്പിലും നിത്യജീവനിലും ഞാൻ വിശ്വസിക്കുന്നു. ആമേൻ.
പിതാവിനും പുത്രനും പരിശുദ്ധാത്മാവിനും സ്തുതി. ആദിയിൽ എപ്രകാരമോ ഇപ്പോഴും, എപ്പോഴും, എന്നേക്കും അപ്രകാരം തന്നെ. ആമേൻ.
നന്മനിറഞ്ഞ മറിയമേ സ്വസ്തി! കർത്താവ് അങ്ങയോടുകൂടെ. സ്ത്രീകളിൽ അങ്ങ് അനുഗൃഹീതയാകുന്നു. അങ്ങയുടെ ഉദരഫലമായ ഈശോയും അനുഗൃഹീതനാകുന്നു. പരിശുദ്ധ മറിയമേ, ദൈവമാതാവേ, പാപികളായ ഞങ്ങൾക്കുവേണ്ടി ഇപ്പോഴും ഞങ്ങളുടെ മരണസമയത്തും പ്രാർത്ഥിക്കണമേ. ആമേൻ.
കർത്താവിന്റെ മാലാഖ മറിയത്തെ വന്ദിച്ചു. അങ്ങ് പരിശുദ്ധാത്മാവിനാൽ ഗർഭം ധരിച്ചു. — നന്മനിറഞ്ഞ മറിയമേ... ഇതാ, കർത്താവിന്റെ ദാസി. അങ്ങയുടെ വാക്കുപോലെ എന്നിൽ ഭവിക്കട്ടെ. — നന്മനിറഞ്ഞ മറിയമേ... വചനം മാംസമായി തീർന്നു. നമ്മുടെ ഇടയിൽ വസിച്ചു. — നന്മനിറഞ്ഞ മറിയമേ... ദൈവമാതാവേ, ഞങ്ങൾക്കായി പ്രാർത്ഥിക്കണമേ. മിശിഹായുടെ വാഗ്ദാനങ്ങൾക്ക് ഞങ്ങൾ യോഗ്യരാകുമാറാകട്ടെ. ആമേൻ.
ഏറ്റവും കാരുണ്യവതിയായ കന്യകാമറിയമേ, അങ്ങയുടെ സംരക്ഷണത്തെ പ്രാർത്ഥിച്ച്, അങ്ങയുടെ സഹായം യാചിച്ച്, അങ്ങയുടെ മധ്യസ്ഥതയെ അഭയം പ്രാപിച്ച ആരെങ്കിലും നിരാശരായി മടങ്ങിയതായി കേട്ടിട്ടില്ലെന്ന് ഞാൻ ഓർക്കുന്നു. ഈ വിശ്വാസത്തോടെ, അല്ലയോ കന്യകകളുടെ കന്യകേ, അല്ലയോ മാതാവേ, ഞാൻ അങ്ങയുടെ പക്കൽ ഓടിയെത്തുന്നു. ഈ പാപിയും കരയുന്നവനുമായ ഞാൻ അങ്ങയുടെ പാദങ്ങളിൽ വണങ്ങുന്നു. വചനത്തിന്റെ മാതാവേ, എന്റെ പ്രാർത്ഥനകളെ അവഗണിക്കാതെ കാരുണ്യപൂർവ്വം കേട്ടരുളണമേ. ആമേൻ.
എന്റെ കാവൽമാലാഖേ, പ്രിയ കൂട്ടുകാരാ, ദൈവത്തിന്റെ കാരുണ്യത്താൽ ഇവിടെ എനിക്ക് കാവൽനിൽക്കാൻ ഏല്പിക്കപ്പെട്ടവനേ, ഈ ദിവസവും രാത്രിയും എന്നോടൊപ്പം ഉണ്ടാകണമേ. എന്നെ പ്രകാശിപ്പിക്കണമേ, കാത്തുപാലിക്കണമേ, വഴികാട്ടണമേ, നയിക്കണമേ. ആമേൻ.
വി. മിഖായേൽ മാലാഖേ, യുദ്ധത്തിൽ ഞങ്ങളെ കാക്കണമേ. പിശാചിന്റെ ദുഷ്ടതയ്ക്കും കെണികൾക്കുമെതിരെ ഞങ്ങളുടെ സംരക്ഷകനായിരിക്കണമേ. ദൈവം അവനെ ശാസിക്കട്ടെയെന്ന് ഞങ്ങൾ താഴ്മയോടെ പ്രാർത്ഥിക്കുന്നു. സ്വർഗ്ഗീയ സൈന്യങ്ങളുടെ നായകനായ അങ്ങ്, ദൈവത്തിന്റെ ശക്തിയാൽ, ആത്മാക്കളെ നശിപ്പിക്കാൻ ലോകത്തിൽ ചുറ്റിത്തിരിയുന്ന സാത്താനെയും മറ്റു ദുഷ്ടാത്മാക്കളെയും നരകത്തിലേക്ക് തള്ളിയിടണമേ. ആമേൻ.
നിത്യവിശ്രമം അവർക്കു നൽകണമേ, കർത്താവേ, നിത്യപ്രകാശം അവരുടെ മേൽ പ്രകാശിക്കട്ടെ. ദൈവത്തിന്റെ കാരുണ്യത്താൽ, വിശ്വസിച്ച് മരിച്ച എല്ലാവരും സമാധാനത്തിൽ വസിക്കട്ടെ. ആമേൻ.
എല്ലാറ്റിനെയും നവീകരിക്കുന്നവനും വിശുദ്ധീകരിക്കുന്നവനുമായ പരിശുദ്ധാത്മാവേ, എഴുന്നള്ളി വരണമേ. അവിടുന്ന് ഞങ്ങളിൽ നിറഞ്ഞുനിൽക്കുകയും അവിടുത്തെ സ്നേഹത്തിൻറെ കതിരുക ഞങ്ങളിൽ പരത്തുകയും ചെയ്യേണമേ. നിത്യവും ഞങ്ങളിൽ വസിക്കുന്നവനായ പരിശുദ്ധാത്മാവേ, അനുതാപത്തിൻെറ അരൂപി ഞങ്ങൾക്ക് തരണമേ. പാപത്തിൽ നിന്നും പാപസാഹചര്യങ്ങളിൽ നിന്നും ഞങ്ങളെ അകറ്റണമേ. എല്ലാ വിജ്ഞാനത്തിൻെറയും, അറിവിൻെറയും ഉറവിടമായ പരിശുദ്ധാത്മാവേ, യേശുവിൻെറ പഠനങ്ങളാൽ ഞങ്ങളെ പ്രബുദ്ധരാക്കമേ. വിശ്വാസത്തിൽ ഉറപ്പിക്കുകയും പ്രത്യാശയിൽ നടത്തുകയും ചെയ്യണമേ. വേദനിക്കുന്നവരെ ആശ്വസിപ്പിക്കുന്നവനും ദുഃഖിതരെ ആനന്ദിപ്പക്കുന്നവനുമായ പരിശുദ്ധാത്മാവേ, അവിടുത്തെ സമാശ്വാസത്തിൻെറ ശീതളച്ഛായയിൽ ഞങ്ങളെ നിർത്തണമേ. സ്നേഹത്തിലും വിശുദ്ധിയിലും ഞങ്ങളെ വളർത്തണമേ. അഗതകളുടെ ആശ്രയവും വരങ്ങളുടെ ദാതാവുമായ പരിശുദ്ധാത്മാവേ, അവിടുത്തെ അനുഗ്രഹത്തിൻെറ സമൃദ്ധിയാൽ ഞങ്ങളുടെ ദാരിദ്ര്യം അകറ്റണമേ. മനസ്സിൻറെ ശൂന്യത മാറ്റി ഹൃദയം ഉജ്വലിപ്പിക്കണമേ. ഞങ്ങളുടെ മദ്ധൃസ്ഥനും മാർഗവുമായ പരിശുദ്ധാത്മാവേ, ഞങ്ങളുടെ വഴികൾ അങ്ങ് നേരെയാക്കുകയും വഴിതെറ്റിപ്പോയവരെ നേർവഴിക്ക് നയിക്കുകയും ചെയ്യേണമേ. സത്യത്തിലും നീതിയിലും ഞങ്ങളെ നടത്തണമേ. ഐക്യത്തിൻെറ നിദാനമായ പരിശുദ്ധാത്മാവേ, അകന്നുപോയവരെ അടുപ്പിക്കുകയും ഭിന്നതകൾ അകറ്റുകയും ചെയ്യണമേ. ഞങ്ങളുടെ നെടുവീർപ്പുകളിലും വിലാപങ്ങളിലും ഞങ്ങളെ ആശ്വസിപ്പിക്കേണമേ. ഞങ്ങളുടെ സമ്മേളനങ്ങളെ അങ്ങു നയിക്കുകയും ഉദ്യമങ്ങളെ വിജയിപ്പിക്കുകയും ചെയ്യേണമേ ആമേൻ.
1 സ്വർഗ്ഗ 1 നന്മ 1 വിശ്വാസപ്രമാണം നിത്യപിതാവേ, ഞങ്ങളുടെയും ലോകം മുഴുവന്റെയും പാപങ്ങൾക്ക് പരിഹാരമായി ഞങ്ങളുടെ നാഥനും രക്ഷകനും അങ്ങേ ഏറ്റവും വാത്സല്യമുള്ള പുത്രനുമായ ഈശോമിശിഹായുടെ തിരുശരീരവും തിരുരക്തവും ആത്മാവും ദൈവത്വവും അങ്ങേക്ക് ഞങ്ങൾ അർപ്പിക്കുന്നു. (1 പ്രാവശ്യം) ഈശോയുടെ അതിദാരുണമായ പീഡാനുഭവത്തെകുറിച്ച്, ഞങ്ങളുടെയും ലോകം മുഴുവന്റെയുംമേൽ കരുണയായിരിക്കണമേ. (10 പ്രാവശ്യം) പരിശുദ്ധനായ ദൈവമേ, പരിശുദ്ധനായ ബലവാനേ, പരിശുദ്ധനായ അമർത്യനെ, ഞങ്ങളുടെയും ലോകം മുഴുവന്റെയുംമേൽ കരുണയായിരിക്കണമേ. (3 പ്രാവശ്യം) (ഈ ക്രമം ആകെ 5 പ്രാവശ്യം ആവർത്തിക്കുന്നു — ഓരോ തവണയും "നിത്യപിതാവേ..." മുതൽ "...കരുണയായിരിക്കണമേ" വരെയുള്ള ഭാഗം.)
നിത്യനായ ദൈവമേ ഇന്നേദിവസം ലോകമാസകലം അർപ്പിക്കപ്പെടുന്ന എല്ലാ ദിവ്യബലികളോടും ചേർത്ത് പ്രിയപുത്രനായ ഈശോമിശിഹായുടെ തിരുരക്തം ശുദ്ധീകരണസ്ഥലത്ത ആത്മാക്കൾക്ക് വേണ്ടിയും ലോകമാസകലമുള്ള പാപികൾക്കുവേണ്ടിയും എൻറെ ഭവനത്തിലെയും കുടുംബത്തിലെയും പാപികൾക്കുവേണ്ടി ഞാൻ അർപ്പിക്കുന്നു. ആമ്മേൻ.
ഓ എൻെറ ഈശോയെ, അങ്ങ് എന്നിൽ എഴുന്നള്ളി വന്നതിനാൽ എൻെറ ഹൃദയം സന്തോഷം കൊണ്ട് നിറഞ്ഞിരിക്കുന്നു. അങ്ങു എന്നും എൻെറ ഉള്ളിൽ വസിക്കണമെ. ഇനി ഒരിക്കലും അങ്ങ് എന്നിൽനിന്ന് അകന്നുപോകരുതേ. ഈശോയെ എൻെറ മാതാപിതാക്കളെയും സഹോദരങ്ങളെയും നിൻെറ തൃക്കരങ്ങളിൽ ഞാൻ സമർപ്പിക്കുന്നു. അവരെ അങ്ങ് അനുഗ്രഹിക്കണമേ. എൻെറ അധ്യാപകർക്കും കൂട്ടുകാർക്കും അയൽകൂട്ടുകാർക്കും ധാരാളം നന്മകൾ നൽകണമേ. ഇനി ഒരു നാളും പാപം ചെയ്യുവാൻ എനിക്ക് ഇടവരുത്തരുതേ. അങ്ങേയ്ക്കി ഇഷ്ടമുള്ള നല്ല കുഞ്ഞായി വളരുവാൻ എന്നെ അനുഗ്രഹിക്കണമേ. ഈ ലോകത്തിൻെറ കറ പുരളാതെ എന്നെ കാത്തുകൊള്ളണമെ. പൂവുപോലെ നിർമ്മലമായ ഒരു ഹൃദയം എനിക്ക് തരണമെ. യേശുവിനെ വളർത്തിയ പരിശുദ്ധ അമ്മേ അമ്മയുടെ മകന് പ്രിയപ്പെട്ട മകനായി / മകളായി ജീവിക്കുവാൻ എനിക്കുവേണ്ടി മാധ്യസ്ഥം അപേക്ഷിക്കണമെ. ഈശോയുടെ വളർത്തു പിതാവായ വിശുദ്ധ യൗസേപ്പേ, എന്നെ കാത്തുകൊള്ളണമേ. സ്വർഗ്ഗത്തിലെ സകല വിശുദ്ധരെ, എൻെറ കാവൽ മാലാഖയെ എനിക്ക് കാവൽ നൽകണമെ. ആമ്മേൻ.
കന്യകാമറിയമേ, സ്നേഹവും കരുണയും നിറഞ്ഞ ഹൃദയവും മക്കളുടെ സഹായത്തിനായി എപ്പോഴും കർമ്മനിരതമാകുന്ന കൈകളും ഉള്ള മാതാവേ, എൻ്റെ ജീവിതത്തിലെ കുരുക്കുകളെ നിൻറ്റെ കരുണ നിറഞ്ഞ കണ്ണുകളാൽ കടാക്ഷിക്കണമേ. നിന്റെ കൈകൾക്ക് അഴിക്കാനാവാത്ത കുരുക്കുകളില്ലലോ കരുത്തറ്റ മാതാവേ, നിൻറ്റെ കൃപയാലും നിൻറ്റെ മകനും എൻ്റെ വിമോചകനുമായ ഈശോയുടെ പക്കലുള്ള നിൻറ്റെ മദ്ധ്യസ്ഥശക്തിയാലും ഈ കുരുക്ക് നീ കൈയിലെടുക്കണമേ. [ഇവിടെ ആവശ്യം പറയുക] ദൈവമഹത്വത്തിനായി ഈ കുരുക്ക് എന്നേയ്ക്കുമായി അഴിച്ചുകളയേണമേ. അമ്മേ, എൻ്റെ ഈ അപേക്ഷ കേൾക്കേണമേ, വഴി നടത്തേണമേ, സംരക്ഷിക്കണമേ.
കർത്താവിന്റെ മാലാഖ പരിശുദ്ധ മറിയത്തോട് വചിച്ചു. പരിശുദ്ധാത്മാവാൽ മറിയം ഗർഭം ധരിച്ചു. (1 നന്മ.) ഇതാ കർത്താവിന്റെ ദാസി, നിന്റെ വചനം പോലെ എന്നിലാകട്ടെ. (1 നന്മ.) വചനം മാംസമായി നമ്മുടെ ഇടയിൽ വസിച്ചു. (1 നന്മ.) ഈശോ മിശിഹായുടെ വാഗ്ദാനങ്ങൾക്ക് ഞങ്ങൾ യോഗ്യരാകുവാൻ... സർവ്വേശ്വരന്റെ പരിശുദ്ധ മാതാവേ, ഞങ്ങൾക്കുവേണ്ടി അപേക്ഷിക്കണമേ. പ്രാർത്ഥിക്കാം സർവ്വേശ്വര, മാലാഖയുടെ സന്ദേശത്താൽ അങ്ങയുടെ പുത്രനായ ഈശോ മിശിഹായുടെ മനുഷ്യാവതാരവാർത്ത അറിഞ്ഞിരിക്കുന്ന ഞങ്ങൾ അവിടുത്തെ പീഡാനുഭവവും കുരിശു മരണവും മുഖേന ഉയിർപ്പിന്റെ മഹിമ പ്രാപിക്കാൻ അനുഗ്രഹിക്കണമേയെന്ന് ഞങ്ങളുടെ കർത്താവായ ഈശോ മിശിഹാ വഴി അങ്ങയോട് ഞങ്ങൾ അപേക്ഷിക്കുന്നു. ആമ്മേൻ. (3 ത്രിത്വസ്തുതി)
വിഷമതകളിൽ ശരണപൂർവ്വം അങ്ങേ ആശ്രയം തേടി യാചിക്കുന്നവരുടെ പ്രാർത്ഥനകളെ ദയാപൂർവ്വം സാധിച്ചുകൊടുത്ത് അവരെ സഹായിക്കുന്ന പരിശുദ്ധനായ പാലകാ ദൈവത്തോടും ഈശോയുടെ മാധുര്യമേറുന്ന തിരുഹൃദയത്തോടും അങ്ങേയ്ക്കുണ്ടായിരുന്ന ഭക്തിയേയും സ്നേഹത്തേയും പരി. കന്യാമറിയത്തിൻ്റെ നേരെയുണ്ടായിരുന്ന തീക്ഷ്‌ണമായ വണക്കത്തേയും അങ്ങയുടെ ഭക്തി ജീവിതത്തിന് സഹായമായിരുന്ന വി. ഫ്രാൻസീസ് അസീസിയോടുമുണ്ടായിരുന്ന സ്നേഹത്തെക്കുറിച്ചും അടുത്തുവരുന്ന പരീക്ഷയിൽ അങ്ങയുടെ പ്രത്യേക സഹായം നൽകണമെന്ന് നിന്നോട് അപേക്ഷിക്കുന്നു. വളരെ നാളായി ബുദ്ധിമുട്ടും പ്രയാസവും സഹിച്ച് എന്നാൽ കഴിയുന്ന വിധം ഞാൻ പഠനം നടത്തിയിട്ടുണ്ടെന്ന് അങ്ങേയ്ക്കറിയാമല്ലോ. എന്നാൽ ഇവയിൽ മാത്രം ഞാൻ ശരണം വയ്ക്കുന്നില്ല, പിന്നെയോ അങ്ങയുടെ സഹായം എനിക്കാവശ്യമാണെന്ന് ഞാനറിയുകയും ആയത് ഹൃദയപൂർവ്വം ഞാൻ യാചിക്കുകയും ചെയ്യുന്നു. പരി. കന്യാമറിയത്തിൻ്റെ സഹായത്താൽ അങ്ങ് ഇതുപോലെ ഗൗരവമേറിയ പരീക്ഷയിൽ പ്രശസ്‌തമാം വിധം വിജയം പ്രാപിച്ചു എന്നുള്ളതോർത്തുകൊണ്ട് അങ്ങ് എൻ്റെ സഹായത്തിനായി വന്ന് എനിക്കേറ്റവും നന്നായി അറിയുന്നവ പരീക്ഷിക്കപ്പെടുന്നതിന് എൻ്റെ ബുദ്ധി നന്നായി പ്രകാശിപ്പിക്കപ്പെടുന്നതിനും എന്റെ സംശയങ്ങളിൽ നിന്നും എന്നെ നീക്കുന്നതിനും ഇടയാക്കണമെ. എൻ്റെ സംരക്ഷകനായ പുണ്യവാനേ, എന്നെ മുഴുവനും നിനക്ക് ഭരമേല്പിക്കുകയും എന്റെ ശരണം വൃഥാ ആവുകയില്ലെന്ന് വിശ്വസിക്കകയും ചെയ്യുന്നു. ആമ്മേൻ.
പിതാവിന്റെയും പുത്രന്റെയും പരിശുദ്ധാത്മാവിന്റെയും നാമത്തിൽ, ആമ്മേൻ. ഞങ്ങളുടെ സൃഷ്ടാവും പിതാവുമായ ദൈവമേ, ഈ സുപ്രഭാതത്തിൽ ഞങ്ങളങ്ങയെ ആരാധിക്കുകയും സ്തുതിക്കുകയും ചെയ്യുന്നു. പാപികളായ ഞങ്ങളെ അന്ധകാരത്തിൽ നിന്നും പ്രകാശത്തിലേക്ക് ആനയിച്ച കർത്താവേ, ഞങ്ങൾ അങ്ങയോട് നന്ദി പറയുന്നു. ഇന്നത്തെ ഞങ്ങളുടെ എല്ലാ പ്രവൃത്തികളും ഞങ്ങൾ അങ്ങേക്കു കാഴ്ച വെയ്ക്കുന്നു. വിശ്വാസത്തോടും തീഷ്ണതയോടും കൂടി അങ്ങേക്കു വേണ്ടി ജോലി ചെയ്യുവാൻ ഞങ്ങളെ സഹായിക്കണമേ. ഇന്നത്തെ ഞങ്ങളുടെ എല്ലാ ഉദ്യമങ്ങളും വിജയിപ്പിക്കണമേ. ഞങ്ങളുടെ ചിന്തകളിലും പ്രവർത്തനങ്ങളിലും പ്രകാശം വീശി ഞങ്ങളെ നയിക്കുകയും എല്ലാവിധ ആപത്തുകളിലും അപകടങ്ങളിലും നിന്നു ഞങ്ങളെ കാത്തു കൊള്ളുകയും ചെയ്യണമേ. മിശിഹായിൽ എല്ലാം നവീകരിക്കുവാനും അങ്ങയെ മഹത്ത്വപ്പെടുത്തുവാനും ഞങ്ങളെ ശക്തരാക്കണമേ. അങ്ങയുടെ ത്രിത്വത്തിന്റെ നിഗൂഡമായ ശക്തിയാൽ ദുഷ്ട സൈന്യങ്ങളിൽ നിന്നും ഞങ്ങളെ കാത്തു കൊള്ളണമേ. നിത്യ രാജ്യത്തിലേക്കുള്ള യാത്രയിൽ തുണയും സങ്കേതവും നൽകി സ്നേഹപൂർവ്വം ഞങ്ങളെ നയിക്കുകയും അങ്ങയുടെ പരിപാലനയുടെ തണലിൽ ഇന്നേ ദിവസം ഞങ്ങളെ കാത്തു കൊള്ളുകയും ചെയ്യണമേ. പിതാവും പുത്രനും പരിശുദ്ധാത്മാവുമായ സർവ്വേശ്വരാ. ആമ്മേൻ. (ത്രിത്വസ്തുതി)
ഞങ്ങളുടെ രക്ഷകനും നാഥനുമായ ഈശോയെ, ഞങ്ങൾ അങ്ങയെ സ്തുതിക്കുകയും ആരാധിക്കുകയും ചെയുന്നു. എന്നിൽ വിശ്വാസമർപ്പിച്ചുകൊണ്ട് അങ്ങുന്ന് എന്നെ ഭാരമേല്പിച്ചിരിക്കുന്ന ഈ പ്രത്യേക ശുശ്രൂഷയെ പ്രതി ഞാൻ അങ്ങേക്ക് നന്ദി പറയുന്നു. മനുഷ്യസേവനത്തിനായി അങ്ങ് എനിക്ക് നൽകിയിരിക്കുന്ന അവസരമായി ഈ ശുശ്രൂഷയെ കാണുവാനും അതിൽ അഭിമാനം കൊള്ളുവാനും എന്നെ അങ്ങുന്ന് അനുഗ്രഹിക്കണമേ. എൻറെ എല്ലാ കഴിവുകളേയും സാഹചര്യങ്ങളെയും അങ്ങയുടെ പ്രത്യേക സംരക്ഷണക്കും പരിപാലനക്കുമായി ഞാൻ സമർപ്പിക്കുന്നു. എൻറെ സഹായം അഭ്യർത്ഥിച്ചുകൊണ്ട് എൻറെ പക്കൽ അണയുന്ന എല്ലാവരോടും സ്നേഹത്തോടും സൗമ്യതയോടുംകൂടി പെരുമാറുവാൻ അങ്ങ് എന്നെ അനുഗ്രഹിക്കണമേ. നീതിബോധത്തോടും സത്യസന്ധതയോടും കൂടെ സേവനമനുഷ്ട്ടിക്കുവാനും നിരുത്തരവാദിത്വപരമായ പെരുമാറ്റംവഴി ആരേയും വേദനിപ്പിക്കാതിരിക്കുവാനും അങ്ങുന്ന് എന്നെ ശക്തനാക്കണമേ (ശക്തയാക്കണമേ). എൻറെ ചിന്തകളോ വാക്കുകളോ പ്രവർത്തികളോ വഴി അങ്ങയുടെ മുമ്പിൽ കുറ്റക്കാരനായിത്തീരാൻ (കുറ്റക്കാരിയായിത്തീരാൻ) അങ്ങുന്ന് എന്നെ അനുവദിക്കരുതേ. എല്ലായ്പ്പോഴും അങ്ങേക്ക് പ്രീതികരമായവിധം ശുശ്രൂഷചെയ്തുകൊണ്ട് അവിടുത്തെ മഹത്ത്വപ്പെടുത്തുവാനും അവസാനം ഞങ്ങളെല്ലാവരുമൊരുമിച്ച് അങ്ങയുടെ മഹത്വത്തിൽ പങ്കുകാരാകുവാനും ഞങ്ങളെ അങ്ങുന്ന് അനുഗ്രഹിക്കണമേ. നിത്യം പിതാവും പുത്രനും പരിശുദ്ധാത്മാവുമായ സർവ്വേശ്വരാ. ആമ്മേൻ.
ഞങ്ങളുടെ രക്ഷകനും നാഥനുമായ ഈശോയേ, അങ്ങയുടെ പ്രത്യേക അനുഗ്രഹം സ്വീകരിക്കുവാനായി അവിടുത്തെ സന്നിധിയിൽ അണഞ്ഞിരിക്കുന്ന എന്നെ നീ കരുണാപൂർവം അനുഗ്രഹിക്കണമേ. പരീക്ഷ എഴുതുവാനായി പോകുന്ന എന്നേയും എൻറെ എല്ലാ കഴിവുകളേയും അങ്ങേക്ക് ഞാൻ സമർപ്പിക്കുന്നു. അങ്ങയുടെ വലതുകരം നീട്ടി എന്നെ അനുഗ്രഹിച്ചാലും. വിശുദ്ധ ഗ്രന്ഥവും പ്രവചനങ്ങളും ഗ്രഹിക്കുവാൻ പരിശുദ്ധാത്മാവിനെ അയച്ച് ശ്ലീഹന്മാരുടെ ബുദ്ധിയെ പ്രകാശിപ്പിക്കുകയും മനസ്സിനെ ശക്തിപ്പെടുത്തുകയും ചെയ്ത കർത്താവേ, എൻറെ ബുദ്ധിയെ പ്രകാശിപ്പിക്കുകയും മനസ്സിനെ ശക്തിപ്പെടുത്തുകയും ചെയ്യണമേ. പഠിച്ച കാര്യങ്ങൾ വേണ്ടവിധം ഓർക്കുവാനും ചോദ്യങ്ങൾ യഥോചിതം മനസ്സിലാക്കി, കൃത്യമായി ഉത്തരം എഴുതുവാനും ആവശ്യമായ കൃപാവരം അങ്ങെനിക്കു നൽകണമേ. അങ്ങയുടെ പ്രത്യേക സംരക്ഷണവും പരിപാലനയും ഈ പരീക്ഷയിലുടനീളം എനിക്കു ലഭിക്കുമാറാകട്ടെ. ജീവിതത്തിലെ എല്ലാ സാഹചര്യങ്ങളിലും അങ്ങേ മഹത്ത്വപ്പെടുത്തിക്കൊണ്ടു ജീവിക്കുവാൻ, എന്നെ അങ്ങുന്നു സഹായിക്കുകയും ചെയ്യണമേ. ഞങ്ങളുടെ അമ്മയായ പരിശുദ്ധ കന്യകാമറിയമേ, വിശുദ്ധ ഔസെപ്പിതാവേ, ഞങ്ങൾക്കുവേണ്ടി അപേക്ഷിക്കണമേ. എന്നെ കാക്കുന്ന കർത്താവിന്റെ മാലാഖയെ, എനിക്കു കൂട്ടായിരിക്കണമേ. നിത്യം പിതാവും പുത്രനും പരിശുദ്ധാത്മാവുമായ സർവ്വേശ്വരാ. ആമ്മേൻ.
ഞങ്ങളുടെ രക്ഷകനായ ഈശോയെ, അങ്ങയുടെ അനന്തപരിപാലനയെ ഓർത്ത് ഞങ്ങൾ അങ്ങയെ സ്തുതിക്കുന്നു. അങ്ങയിലുള്ള ആഴമായ വിശ്വാസം ഏറ്റുപറഞ്ഞുകൊണ്ട് അവിടുത്തെ അനുഗ്രഹത്തിനായി ഞാനിതാ അങ്ങയുടെ സന്നിധിയിൽ അണഞ്ഞിരിക്കുന്നു. കർത്താവേ, ഞാൻ ആരംഭിക്കുന്ന ഈ യാത്രയേയും അതിലെ എല്ലാ കാര്യങ്ങളെയും അങ്ങയുടെ പ്രത്യേക സംരക്ഷണയ്ക്കും പരിപാലനയ്ക്കുമായി സമർപ്പിക്കുന്നു. ഈശോയേ, അങ്ങയുടെ വലതുകരം നീട്ടി ഞങ്ങളെ (എന്നെ) അനുഗ്രഹിച്ചാലും. അങ്ങയുടെ സാന്നിധ്യവും സഹായവും ഈ യാത്രയിലുടനീളം ഞങ്ങൾക്ക് (എനിക്ക്) താങ്ങും തണലുമായിരിക്കട്ടെ. യാത്രയിലുണ്ടാകുന്ന എല്ലാവിധ ആപത്തുകളിലും അപകടങ്ങളിലും നിന്നു ഞങ്ങളെ (എന്നെ) കാത്തുകൊള്ളണമേ. ഞങ്ങളുടെ അമ്മയായ പരിശുദ്ധ കന്യകാമറിയമേ, വിശുദ്ധ ഔസേപ്പിതാവേ, ഞങ്ങൾക്കു (എനിക്കു) വേണ്ടി അപേക്ഷിക്കണമേ. ഞങ്ങളെ (എന്നെ) കാക്കുന്ന കർത്താവിന്റെ മാലാഖമാരെ (മാലാഖയെ), ഞങ്ങൾക്ക് (എനിക്ക്) കൂട്ടായിരിക്കണമേ. നിത്യം പിതാവും പുത്രനും പരിശുദ്ധാത്മാവുമായ സർവ്വേശ്വരാ. ആമ്മേൻ.